Lord Shiva’s Murudeshwar temple visit

 മൂന്ന് വശവും അറബിക്കടലാല്‍ ചുറ്റപ്പെട്ട് കിടക്കുന്ന കന്ദുകഗിരിക്കുന്നിന്‍ മുകളില്‍ സ്ഥിതി ചെയ്യുന്ന 123 അടി ഉയരമുള്ള ശിവപ്രതിമ. ലോകത്തിലെ തന്നെ ഏറ്റവും വലിയ രണ്ടാമത്തെ ശിവപ്രതിമയുള്ള മുരുഡേശ്വര ക്ഷേത്രം.

ഈ ശിവ പ്രതിമയാണ് മുരുഡേശ്വറിനെ കര്‍ണാടകയുടെ വിനോദസഞ്ചാര ഭൂപടത്തില്‍ അടയാളപ്പെടുത്തുന്നതെങ്കിലും കടലും തീരവും കുന്നും പ്രതിമയും എല്ലാം ചേര്‍ന്ന് ഒരുക്കുന്ന മാസ്മരികമായ ദൃശ്യവിന്യാസങ്ങളാണ് സഞ്ചാരികളെ ഇവിടേക്ക് ആകര്‍ഷിക്കുന്നത്.

ക്ഷേത്രത്തിന്റെ പ്രവേശന കവാടമാണ് മുരുഡേശ്വറിലെ മറ്റൊരു പ്രധാന ആകര്‍ഷണം. ലോകത്തിലെ തന്നെ ഏറ്റവും വലിയ ഗോപുരങ്ങളിലൊന്നാണ് ഈ രാജഗോപുരമെന്ന് പറയപ്പെടുന്നു. 20 നിലകളും 259 അടി ഉയരവുമുള്ള ക്ഷേത്ര കവാടവും ദൃശ്യങ്ങള്‍ക്ക് മിഴിവേകും. തീര്‍ഥാടനകേന്ദ്രത്തിന്റെ സ്വച്ഛമായ അന്തരീക്ഷത്തേക്കാൾ കാഴ്ചകള്‍ ഇഷ്ടപ്പെടുന്ന യാത്രികരെ തൃപ്തിപ്പെടുത്തുന്ന കേന്ദ്രമാണ് മുരുഡേശ്വര്‍. ദക്ഷിണേന്ത്യന്‍ വാസ്തുവിദ്യാരീതിയില്‍ നിര്‍മ്മിച്ച ഗോപുരവും കൊത്തുപണികളും, സൂര്യദേവന്റെയും രാവണന്‍രെയും നന്ദിയുടെയും മറ്റ് നിരവധി പ്രതിമകളും ഫോട്ടോകളില്‍ തത്പരരായ യാത്രികരെയും ശില്‍പാസ്വാദകരെയും തൃപ്തിപ്പെടുത്തുമെന്നുറപ്പ്.

മൂകാംബിക ദർശനം നടത്തുന്നവർക്ക് സന്ദർശിക്കാൻ സാധിക്കുന്ന ഒരിടം കൂടിയാണിത് .  മൂകാംബികയിൽ നിന്നും ബൈന്ദൂർ എത്തിയാൽ അവിടെ നിന്നും മുരുഡേശ്വറിലേക്കു ബസ് സർവീസും ,  ട്രെയിൻ സർവീസും  ഉണ്ട് .  നേരിട്ടുള്ള ബസ് ലഭിച്ചില്ലെങ്കിൽ ബൈന്ദൂർ നിന്നും ബസ് കയറി  ഭട്കൽ ബസ് സ്റ്റേഷനിൽ എത്തി അവിടെ നിന്നും  മുരുഡേശ്വറിലേക്കു  പോകാവുന്നതാണ് .  ബൈന്ദുർ നിന്നും ഏകദേശം 32 കിലോമീറ്റർ മാത്രമേ മുരുഡേശ്വറിലേക്കു ദൂരം ഉള്ളൂ .  1 മണിക്കൂറിനുള്ളിൽ എത്തിച്ചേരാൻ സാധിക്കും  മുരുഡേശ്വറിൽ എത്തിയാൽ  ലഗേജുകൾ സൂക്ഷിക്കാൻ ലോക്കർ സൗകര്യവും  ലഭ്യമാണ്.